Драги пријатели,
Да се биде градоначалник на Аеродром претставува голема одговорност и сериозен предизвик. Честа да ја водам изборната битка за да служам како иден градоначалник на најголемата општина во Скопје е само почеток на нашето заедничко патување. Тежок е патот што води до целта ‒ Аеродром, функционална општина во која сите еднакво удобно и квалитетно ќе живееме. На тој пат само заедно можеме да успееме, затоа што знаеме, можеме и заслужуваме многу подобро!

Крајно време е да ја подобриме животната средина, да создадеме услови за здрава, чиста и зелена општина, безбедна за растење и спокојна за пензионирање. Конечно мораме да им ставиме крај на хаосот, на безидејноста и на самоволието, кои досега беа одлика на локалните политики. Истовремено тоа ќе биде почеток на создавање целосно нов локален систем што може и мора да функционира беспрекорно, дури и во тешките времиња во кои живееме.

Пред вас е изборната програма за еден нов, убав и хуман Аеродром. Ја подготвивме со вас, одредувајќи ги заедно клучните приоритети, во соработка со врвни експерти од различни области на локалната самоуправа. Покрај мојата визија за развој на општината, програмата ги содржи и најважните чекори на идната општинска администрација, како и многубројни политики што планираме да ги реализираме во првите 4 години. Нашата соработка што започна со создавањето на оваа програма ќе прерасне во партнерство за трајни вредности. Аеродром е нашиот заеднички дом, а вашиот глас е сигурна инвестиција во подобар живот за сите генерации!

Со почит и благодарност,

д-р Александар Трајановски

СОВЕТНИЧКА ЛИСТА НА СОЦИЈАЛДЕМОКРАТСКИОТ СОЈУЗ НА МАКЕДОНИЈА И КОАЛИЦИЈАТА ЗА ОПШТИНА АЕРОДРОМ

1. Милутин Ристески
2. Марина Кусакатска
3. Марјан Јовановски
4. Даниел Самарџиски
5. Марко Данилоски
6. Драгослава Војницалиевска-Ингилизовска
7. Ненад Рашовиќ
8. Бојан Василевски
9. Ана Вељаноска
10. Тања Милков
11. Стојан Лазарески
12. Виктор Ѓошев
13. Трене Дамјановски
14. Ица Николова
15. Сашо Унчевски
16. Светлана Ефремовска
17. Емил Јанев
18. Елена Михајловска
19. Гордана Георгиевска
20. Велика Николиќ
21. Оливер Милевски
22. Никола Ѓорѓиев
23. Бојана Бојкова
24. Штерјо Пушевски
25. Мила Младеновска
26. Теодора Филипоска
27. Александар Саид

Почитувани сограѓани, ист воздух дишеме, по истите улици чекориме, со исти проблеми се соочуваме. Ние не сме само ваши соседи. Ние сме вашиот глас во Советот на Општина Аеродром. Ја бараме вашата доверба за заедно да изградиме општина по мерка на граѓаните ‒ чиста, безбедна и достоинствена за живеење. Ни треба вашиот глас за да ја претвориме надежта во дела, а грижата за секојдневието во конкретни решенија. Ајде заедно да го оствариме нашиот сон: Аеродром ‒ топол, сигурен и пристоен дом за сите!

ШТО НАПРАВИВМЕ НИЕ:

Ново училиште Димитар Македонски во населба Лисиче. Доградба на ООУ Лазо Ангеловски со 4 нови училници. Изградено инклузивно игралиште во ООУ Љубен Лапе и сензорни соби во училиштата Блаже Конески и Ѓорѓија Пулевски.
Изградба на 2 градинки: нов објект на градинката Буба Мара во Ново Лисиче и нов објект Црвенкапа на градинката Срничка.
Реконструкција на платото зад ТЦ Бисер.
Проект за енергетска ефикасност - поставување фотоволтаици на зградите на училиштата. ООУ Лазо Ангеловски доби целосно реконструиран покрив, реконструирани подови и 30 нови врати. Реконструирани подовите на училиштата Љубен Лапе и Блаже Конески, ООУ Ѓорѓија Пулевски доби лифт, реновирани ходникот и тоалетите во ООУ Гоце Делчев.
Изградени булевар АСНОМ, мост Михајло Апостолски и улиците Новопроектирана 8, Новопроектирана 3, краци на ул. Пандил Шишков, кружен тек кај ул. Коста Новаковиќ и други. Започнува изградбата на дел од бул. Васко Карангелески.
Реконструирани булеварите Видое Смилевски-Бато, Февруарски поход, Васко Карангелески, улиците Владимир Комаров, Тодор Чангов 20, Тодор Чангов 49, Ѓорѓи Капчев 9, улица 4 во Долно Лисиче, улица 3 на бул. Трета македонска бригада, пристапната улица кај ООУ Љубен Лапе и повеќе улици-краци во Горно Лисиче и Мичурин. Вкупна должина од над 10 километри.
Реконструиран и проширен регионалниот пат Драчево - Јурумлери низ Долно Лисиче.
Изградени 2 нови паркиралишта во Ново Лисиче, проширено паркиралиштето на 3 локации до бул. В.С. Бато, реконструирано паркиралиште по должината на бул. Јане Сандански, почнувајќи од ООУ Ѓорѓија Пулевски, па сè до крстосницата со булевар Србија – 36.000 м2, паркиралишта во близина на градинката Бамби и ООУ Љубен Лапе.
ТЦ Лисиче доби ново ЛЕД-осветлување и ново јавното осветлување во населба Лисиче.
Нови и реконструирани паркови во Мичурин, на ул. Трета македонска бригада, на ул. Бојмија, на ул. Р. Чајавец, на ул. Пандил Шишков, скверови на крстосницата на бул. Ј. Сандански со ул. В. Комаров и други.
Обновени и нови спортски и детски игралишта обложени со гумена подлога, нови чешми за пиење вода на 30 локации.
Нови паркови за миленици: 2 во должина на бул. Србија еден зад ОУ Љубен Лапе и еден во Реонски центар.
Еднократна парична помош за секое прваче 3.500 ден. Зголемена еднократна парична помош за новороденче од 5.000 на 8.000 ден. Проект интегрирано пливање за деца со попреченост од 1. до 3. одделение. Отворен Центар за кариерен развој.
Реконструирана водоводна и канализациска мрежа на краците од 1 до 10 во Долно Лисиче и на ул. Пандил Шишков.

А ШТО (НЕ) НАПРАВИЈА ТИЕ?!

Ниту една од ветените 4 нови градинки во Мичурин, Острово, Лисиче и Долно Лисиче не е изградена.
Условите за настава во основните училишта се катастрофални, родителите сè уште собираат средства за течен сапун, влажни марамчиња, тонери, хартија и слично.
Нови 100.000 квадратни метри зеленило во Аеродром не се подигнати.
Паркот Радост на 6.000 квадратни метри во Реонски центар, кој требаше да биде готов пред 2 години, сè уште не е завршен.
Општината никогаш не била позапуштена: неискосени и пожолтени тревници, сообраќаен хаос, руинирана урбана опрема, преполни канти и контејнери, диви депонии на секој чекор...
Не се изградени ветените: нова гимназија, нова општинска зграда, 3.000 нови паркинг-места, велопатеки на сите улици, 6 нови кружни тека, нов мултифункционален центар со простории за младински центар, нов спортски центар „Пирин“ во населба Лисиче, Музеј на МЗТ, киносала и театарска сцена во Ново Лисиче.
Не е формиран ветениот енергетски фонд за реконструкција на фасадите на зградите.
Еднократната помош за новороденче не е зголемена од 8.000 на 20.000 денари.

МОЈАТА ВИЗИЈА

Зошто се кандидирате? Што е мотивот?

Животот го посветив на здравјето на луѓето, а здравата животна средина е еден од клучните предуслови за здрав живот. Кандидатурата за градоначалник на најперспективната скопска општина е само логично продолжение на мојата професија, која секојдневно бара брзи одлуки, управување со ресурси и емпатија кон човекот пред тебе.

Колку е важно да се има визија за општината, за нејзино подобро функционирање и за нејзин развој. Дали во тој контекст е потребно да се има и визија за општеството во целина?

Има една позната поговорка, која вели „Визијата без акција е само сон, а акцијата без визија е ноќна мора“. Сите големи достигнувања и во општеството и во животот генерално започнуваат со визија. Аеродром има огромен потенцијал за развој што недоволно се користи, што ја претвори општината во „спалната соба на Скопје“. Ова мора да го промениме. Аеродром мора да биде главната градска движечка сила во сите сфери, како што се бизнисот, спортот, образованието и културата.

Што е тоа што сметате дека мора да се направи во следниот мандат и натаму? Нешто што ќе направи промена. Дали е доволно да се понудат само инфраструктурни проекти?

Во последните 20 години во Аеродром се изградени над 100 станбени згради на површина од околу 3 km2. Денешниот проблем со недостиг на места во градинките и училиштата, недостиг на паркинг-простор, зелени површини, проблеми со водоснабдувањето е само реална последица на лошото планирање и управување со парите, во полза на бизнис-интересите. Ова мора да се промени. Општините се на граѓаните, заради нив постојат. Недозволиво е во толкава општина да нема ниту еден објект на културата, ниту една гимназија, ниту еден деловен центар, во крајна линија, недозволиво е општината да нема сопствен објект за општинската администрација и да плаќа скапи кирии на приватни компании.

Колку се важни младите за нашата општина?

Во природата на младите луѓе е поривот за брз прогрес и квалитетен живот. Со својата енергија, флексибилност и отвореност кон современите технологии тие се двигатели на развојот на локалните економии на секој поголем град. Градоначалниците често влегуваат во заблуда дека мали инвестиции во спортот, образованието и ноќниот живот се доволни за да ги задржат младите во своите општини. Потребно е да се погледне малку пошироко на работите. Вложувањето во програми за поддршка на локални млади претприемачи, превентивната здравствена заштита кај младите, создавањето услови за поголема мобилност и дигитализацијата на јавните услуги, на пример, можат сериозно да придонесат една општина да стане многу поатрактивна средина за младите луѓе.

Како гледате на општата безбедност на граѓаните? Кои се проблемите и како може да се решаваат?

Почнувајќи од безбедноста на улиците, преку безбедноста во училиштата, па сè до безбедноста во ноќните клубови, нашите сограѓани имаат безброј причини да се чувствуваат небезбедно. Зголемувањето на бројот на сообраќајни несреќи, кражби, пожари, трговијата со наркотици се сериозен аларм дека е потребно да се дејствува брзо и одлучно. Преку инвестирањето во безбедни улици, велосипедски патеки, тротоари, противпожарни служби, кампањите за подигнување на јавната свест и ред други активности општините би можеле да бидат значаен фактор во подобрувањето на безбедноста на граѓаните.

Дали доброто планирање на просторот и мобилноста се клуч за забрзан развој, но и за поквалитетно живеење? Што сметате дека е неопходно да се преземе во следниот период?

Бетонизацијата на Аеродром мора да запре што поскоро. Крајно неодговорно е во 21 век да се градат станбени и деловни објекти без да се испланираат нови градинки, училишта, улици со доволно широки тротоари и велопатеки, паркови, спортски и детски игралишта. Трагично е што особено во изминатите 20 години Аеродром беше жртва на едно вакво крајно нехумано планирање на просторот. Последиците ги чувствуваме секој ден и мислам дека не постои човек што нема да се согласи со ова.

Особено во зимските месеци македонските градови се меѓу најзагадените во светот. Во многу места имаме проблем со диви депонии, а граѓаните имаат сериозни забелешки за јавната чистота дури и во најурбаните места. Осудени ли сме сите ние да живееме во ѓубре и отровен воздух?

Потребна е брза и заедничка акција на сите државни институции. Управувањето со отпадот и одржувањето на јавната хигиена станува серозен проблем. Неконтролираното аерозагадување станува директна закана за здравјето и животот на луѓето. Зајакнувањето на инспекциските служби, капацитетите на јавните комунални претпријатија, воведувањето комунална полиција со широки овластувања се само дел од решенијата што мораме итно да ги спроведеме со заеднички сили.

Довербата на граѓаните во системот е на многу ниско ниво, а општата перцепција на јавноста е дека корупцијата цвета во нашата држава. Дали може да ја повратиме таа доверба? Дали подобрувањето на општинските услуги, зголемувањето на транспарентноста и отвореноста на општината кон граѓаните може да даде нова надеж?

Дигитализацијата на јавните услуги, вклучувањето на граѓаните непосредно во креирањето на програмите за работа, интензивната соработка со невладиниот сектор, заживувањето на урбаните заедници се чекорите што водат кон целосно искоренување на корупцијата и бирократските бариери со кои како граѓани секојдневно се среќаваме.

Иселувањето е еден од најголемите проблеми, а следствено и наталитетот е во драстично опаѓање. Имаме ли иднина без луѓе? Како да ги задржиме луѓето во своите места да продолжат да живеат со перспектива за себе и за своите деца?

Вложувањето во здрава животна средина, социјална заштита што ќе овозможи достоинствен живот, квалитетно образование, подобри услови за спорт, богати културни содржини, растечка локална економија и сето тоа придружено со соодветна инфраструктура.

Зошто граѓаните да гласаат за вас? Што е тоа по што сте различни од другите за да ви ја дадат токму вам довербата?

Добра визија, силна енергија и одличен тим. Прочитајте ја програмата до крај. Има реални ветувања, а не список на желби. Тоа се клучните разлики. Аеродром може и мора подобро од ова.

Заедно да ги менуваме состојбите!

Младите во фокусот ‒ иднината почнува денес

Креирање фонд за млади, формирање локален младински совет, изработка на младинска стратегија и акциски план за млади. Финансиска поддршка на млади претприемачи и младински организации со седиште во општината. Финансиска поддршка и промоција на младите таленти, услуги за кариерен развој, доквалификации и преквалификации во соработка со едукативни центри и институции. Модернизација на просторот и целосна дигитализација на училиштата преку целосно опремување со современи едукативни, нагледни и наставни средства. Редовни и современи превентивни здравствени прегледи за млади. Многубројни културни и спортски настани од интерес на младите.

Чиста и здрава животна средина

Реорганизација и зајакнување на комуналните и на инспекциските служби. Воведување комунална полиција со широки овластувања. Редовно одржување на јавната хигиена во секое маало, проширување и обнова на зелените површини. Нова урбана опрема (клупи и канти за џебен отпад на секои 150 метри). Планско градење согласно со принципите на хуманото живеење. Изградба на нови спортски игралишта и спортски зони. Континуирана инспекција и мониторинг на работата на сите регистрирани или потенцијални загадувачи, како и подигнување на еколошката свест кај граѓаните. Субвенции за алтернативни еколошки системи за загревање на домовите. Бесплатни амбулантни прегледи во секоја месна заедница, мобилни ортопедски тимови за возрасните. Воспоставување локален здравствен совет и локални тимови за прва помош во координација со службата за итна медицинска помош.

Функционален и безбеден јавен простор

Уредување на јавниот простор согласно со потребите на граѓаните. Нови и безбедни детски игралишта. Сензорни игралишта, адаптирање на рабниците на тротоарите и изградба на тактилни патеки. Целосно решавање на проблемот со кучињата скитници во соработка со сите надлежни институции на локалната и на централната власт. Отворање на т.н. „урбани лаборатории“, со кои младите ќе можат да ги редизајнираат јавните површини. Нови велосипедски патеки, воведување брз и функционален јавен превоз, како и паметни паркиралишта за одржлива урбана мобилност. Паметно осветлување на сите јавни површини. Редовна контрола на противпожарните системи во станбените згради и изградба на нова противпожарна станица на територијата на Аеродром, во соработка со надлежните институции.

Општини по мерка на граѓаните

Јавен увид во трошењето на народните пари. Отворен ден со градоначалникот и со членовите на Советот, расправи за прашања од јавен интерес, непосредна вклученост на граѓаните во работата на локалната самоуправа со дигитални алатки за давање предлози, сугестии, пријавување проблеми и добивање одговор на поставени прашања. Дигитализација на сите услуги што ги нуди општината со поедноставување на сложените бирократски процедури и кратење на времето на чекање потребно за одлучување и за решавање по барањата на граѓаните, како и целосно искоренување и нула толеранција за корупцијата во локалната самоуправа.

КАПИТАЛНИ ПРОЕКТИ

Две нови детски градинки (во Мичурин и Ново Лисиче)

Опис на проектот

Нашите сограѓани од Аеродром повеќе од една деценија се соочуваат со недостиг на слободни места во детските градинки. Општината е пренаселена, а сегашниот капацитет на градинките не е доволен за да ги опфати сите деца. Често се случува една група со еден воспитувач да брои и повеќе од 25 деца, што е надвор од сите стандарди за работа на детските градинки. Ние планираме изградба на нова детска градинка во населбата Мичурин со капацитет од 300 деца и изградба на нова детска градинка во Ново Лисиче со капацитет од 150 до 250 деца. Двата објекта ќе бидат целосно изградени според највисоки стандарди, со енергетска ефикасност и целосна пристапност за лица со попреченост.

Влијание на проектот:

Со овој проект отвораме нови повеќе од 450 места во детските градинки, со што долгорочно го решаваме недостигот на слободни места во детските градинки.

Целна група:

Родители на деца од предучилишна возраст

Рок на реализација:

2027–2029 година

Буџет

Средства на Општина Аеродром, Владата на РСМ, меѓународни фондови

Нова општинска зграда со мултимедијален центар за млади

Решение на недостигот на паркинг-простор во урбаниот дел на Аеродром преку изградба на нови и реорганизација на постојните паркиралишта согласно со принципите на одржлива урбана мобилност. Проектот предвидува и стимулирање на користење јавен превоз, велосипеди и пешачење за сметка на автомобилскиот превоз.

Влијание на проектот:

Намалување на потребата од прекумерно користење автомобилски превоз преку целосна реорганизација на паркирањето во општината.

Целна група:

Сите жители на Општина Аеродром

Рок на реализација:

2028 година

Буџет

Општина Аеродром и меѓународни фондови

Крај на сообраќајниот хаос

Опис на проектот

Сообраќајното поврзување на Општина Аеродром со соседните општини е од приоритетно значење. Проектот предвидува:

Отворање нови коридори во соработка со Град Скопје преку пуштање во употреба на мостот Михаило Апостолски
Довршување на булеварот АСНОМ, со што ќе се реши сообраќајниот метеж по булеварите Јане Сандански и Србија
Нова сообраќајница за поврзување на Аеродром со Кисела Вода на потегот од фабриката „Раде Кончар“ до населбата 11 Октомври
Поставување семафори на сите сообраќајници каде што има премини за училиште
Изградба на нови велопатеки
Реконструкција и воведување „зона 30“ на сите сервисни улици во општината
Нула толеранција за паркирање по тротоарите и пешачките патеки

УЗ Стар Аеродром

Уредување на зелениот простор и игралиштето меѓу трите воени кули на ул. „Руди Чајавец“, како и нови чешми, клупи и канти за отпадоци во постојните паркови
Нови паркиралишта за зградите на ул. „Владимир Комаров“ бр. 36, 38 и 40, како и решение за паркингот на бул. „Јане Сандански“ бр. 10 и 12
Зачестено присуство на пајак-службата, како и нова побезбедна сообраќајна сигнализација на сите улици
Еднонасочен режим на сообраќај на ул. „Руди Чајавец“, како и редовно миење на улиците
Реконструкција на ул. „Фрањо Клуз“ со краци

УЗ Острово

Сообраќајно решение со соодветна сигнализација пред ООУ „Браќа Миладиновци“
Детско игралиште кај кулите на ул. „Владимир Комаров“
Редовно одржување на зеленилото и урбаната опрема
Решение за уредување на паркинг-просторот зад ТЦ „Скопјанка“
Редовно миење на улиците

УЗ Бисер

Уредување на просторот зад ТЦ „Бисер“ – реновирање и одржување
Доградба, надградба или адаптација на нови училници во ООУ „Љубен Лапе“
Редовно одржување на плочниците меѓу зградите
Субвенции за промена на азбестни покриви и реконструкција на фасадите на зградите
Реконструкција на паркинг-просторот од ул. „Васко Карангелески“ до бул. „Србија“

УЗ Јане Сандански

Редовно одржување на плочниците меѓу зградите
Проширување на паркинг-просторот по должината на бул. „АСНОМ“
Поголем број чешми за вода и канти за отпадоци
Редовно одржување на детските и спортски игралишта
Субвенции за промена на азбестни покриви и реконструкција на фасадите на зградите

УЗ Ново Лисиче

Изградба на мултифункционален културен центар
Нови парковски површини и редовно одржување на постојните
Реконструкција на плочниците и поголем број чешми и канти за отпадоци
Субвенции за промена на азбестни покриви и реконструкција на фасадите на зградите
Решавање на проблемот со паркирањето преку изградба на нови и проширување на постојните паркиралишта

УЗ Населба Лисиче

Ревизија на ДУП-от што не е во согласност со хуманото живеење и бришење на висококатниците
Целосна реконструкција на објект Пчелка 1 – градинка Буба Мара
Хортикултурно уредување на неискористениот простор
Поголема грижа за зеленилото, урбаната опрема, хигиената и безбедноста на граѓаните
Субвенции за еколошки системи за затоплување на домовите

УЗ Горно Лисиче

Нов ДУП за ул. Тодор Чангов
Реконструкција на споредни улици
Атмосферска канализација (ул. Тодор Чангов и Ѓорѓи Капчев)
Реновирање и реконструкција на детски реквизити во ООУ Гоце Делчев
Решение за проблемот со депониите ‒ комунална полиција

УЗ Долно Лисиче

Велосипедска патека, проширување и осветлување на патот Горно ‒ Долно Лисиче
Редовно празнење на контејнери и куќни канти за отпадоци
Поставување чешми за вода и канти за отпадоци
Реконструкција на споредни улици
Чистење на шутот и дивите депонии околу црквата и кај мостот на реката Вардар