Особено во зимските месеци македонските градови се меѓу најзагадените во светот. Во многу места имаме проблем со диви депонии, а граѓаните имаат сериозни забелешки за јавната чистота дури и во најубавите места. Осудени ли сме сите ние да живееме во ѓубре и отровен воздух?
Не, не сме осудени, но ако не дејствуваме веднаш, ќе си ја уништиме иднината. Загадувањето и дивите депонии не се само еколошки, туку и здравствени и морални прашања. Во многу случаи виновна е немарноста, и на институциите и на поединците. Општината мора да покаже одлучност: систем за собирање и селекција на отпад, санкции за загадувачи, екоедукација, пошумување и поддршка за еколошко греење.
Довербата на граѓаните во системот е на многу ниско ниво, а општа перцепција на јавноста е дека корупцијата „цвета“ во нашата држава. Дали може да ја повратиме таа доверба? Дали подобрувањето на општинските услуги, зголемувањето на транспарентноста и отвореноста на општината кон граѓаните може да даде нова надеж?
Довербата не се враќа со зборови, туку со дела. Да, корупцијата е длабоко вкоренета, но токму за тоа општината мора да биде пример за транспарентност, отчетност и фер одлуки. Кога граѓаните ќе видат дека нивниот глас се слуша, дека има фер постапки, дека јавните пари одат таму каде што треба, тогаш почнува да се гради доверба.
Иселувањето е еден од најголемите проблеми, а следствено и наталитетот е во драстично опаѓање. Имаме ли иднина без луѓе? Како да ги задржиме луѓето во своите места да продолжат да живеат со перспектива за себе и своите деца?
Без луѓе нема иднина. Празните училишта, затворените продавници и напуштените домови ни го кажуваат тоа секој ден. Иселувањето и падот на наталитетот се резултат на недовербата, несигурноста и недостигот на перспектива. Затоа мора да понудиме услови што ќе ги задржат луѓето дома: стабилни работни места, квалитетно образование, добра здравствена грижа, поддршка за младите семејства, чиста животна средина и можност за достоинствен живот.
Зошто граѓаните да гласаат за вас? Што е тоа по што сте различни од другите за да ви ја дадат токму Вам довербата?
Граѓаните да гласаат за мене затоа што јас сум дел од заедницата, ги разбирам нивните проблеми и навистина ми е грижа. Не ветувам ветувања што не можам да ги исполнам туку ветувам работа, присуство и борба за секој човек. Различна сум затоа што мојот приод е искрен, транспарентен и базиран на конкретни решенија.
