Колку се важни младите за нашата општина?
Младите се срцето и иднината на Гевгелија. И секој заминат млад човек е како да згаснал еден пламен што требало да ја осветли нашата иднина. Многу мајки денес леат солзи затоа што нивните деца ја напуштија државата – затоа што овде не им беше дадена шанса, затоа што нивната работа не беше ценета, затоа што власта ги натера да бараат перспектива во туѓина.
А вистината е болна: ако продолжи ова темпо, Гевгелија ризикува да стане град на пензионери, без младост, без иднина. Но јас верувам дека тоа може да се промени. Верувам дека секој млад човек има своја шанса, тука дома, без разлика на вера, етничка или политичка припадност.
Мојата визија е Гевгелија да биде град што им дава можности на младите – за работа, за креативност, за спорт, за култура, за живот со достоинство. Младите не се „иднината“ само како збор што убаво звучи, тие се нашата најголема потреба денес. Без нив нема кој да ја продолжи приказната на нашиот град. Затоа мојата најголема борба е да ги задржиме тука, да им дадеме надеж, заедно да ја изградиме иднината.
Како гледате на општата безбедност на граѓаните? Кои се проблемите и како може да се решаваат?
Гевгелија пред само четири години беше град на солидарност, на мирен живот, со безбедни улици, функционални сообраќајни знаци и семафори. Луѓето излегуваа на улица без страв, а соседите се гледаа како пријатели, не како непознати.
За жал, со актуелната власт многу од тоа исчезна. Живееме во чудно време кога дури и најмалите, кога се соочуваат со проблем, почнуваат со репликата „знаеш ли чиј сум јас“. Тоа јасно покажува дека довербата и безбедноста кај граѓаните е нарушена.
За да го решиме ова, ќе преземеме конкретни мерки: зголемена присутност на полицијата на клучни локации, обнова и модернизација на сообраќајната сигнализација, систем за брза реакција при пријави на нарушување на редот, но и програми за превенција и едукација на младите за правилно однесување и граѓанска одговорност.
Ветувам дека безбедноста ќе биде апсолутен приоритет. Ќе ги вратиме редот, функционалните сообраќајни системи и механизми што обезбедуваат еднаквост и сигурност за сите – без поделби на „ваши“ и „наши“. Секој човек мора да се чувствува безбедно на својата улица, дома и во својата заедница. Тоа не е само политика, тоа е должност, одговорност и ветување што ќе го исполнам.
Дали доброто планирање на просторот и мобилноста се клуч за забрзан развој, но и за поквалитетно живеење?
Апсолутно, доброто планирање на просторот и мобилноста е основата за секој квалитетен развој. Кога улиците, парковите, јавниот превоз и инфраструктурата се функционални и добро организирани, граѓаните го чувствуваат тоа секој ден – помалку стрес, побезбедно движење, почиста животна средина и повеќе време за семејството и за заедницата.
Мојата визија е Гевгелија да биде град што се движи хармонично – каде што секој патник, пешак или велосипедист ќе има своето место, каде јавните простори ќе ги поттикнуваат луѓето да се сретнуваат, да учат, да се рекреираат и да создаваат. Плановите за развој ќе бидат долгорочни и одржливи, со секој нов проект да го подобрува животот на граѓаните, а не само да го „засени“ градот со бетон.
Сметам дека токму добро планираното движење и просторно уредување ќе донесат забрзан развој, но и вистинско квалитетно живеење – затоа што развојот без ред, организација и грижа за луѓето е само илузија.
Особено во зимските месеци македонските градови се меѓу најзагадените во светот. На многу места имаме проблем со диви депонии, а граѓаните имаат сериозни забелешки за јавната чистота дури и во најурбаните места. Осудени ли сме сите ние да живееме во ѓубре и отровен воздух?
Не, не сме осудени! Гевгелија заслужува чист воздух, здрав живот и убаво место за живеење. Загадувањето и дивите депонии се еден од највидливите знаци дека нашата грижа за околината е занемарена, но тоа не е неизбежно.
Мојата визија е да го вратиме градот на картата на здрави, уредни и функционални општини. Тоа значи системски решенија: модернизирање на јавната чистота, редовно собирање отпад, ефикасно рециклирање, гасификација и поддршка за зелени технологии, како и едукација на граѓаните за заедничка одговорност.
Секоја улица ќе биде чиста, секој парк ќе биде место каде што семејствата можат без страв да излезат на воздух, а децата да дишат безбедно. Не само што можеме, туку и мораме да го сториме тоа, затоа што нашите животи, нашите семејства и иднината на нашите деца се поважни од каква било удобност или краткорочна корист.
Гевгелија може да биде пример за чист град, град што се грижи за своите луѓе и за својата природа каква што и беше до пред да дојде актуелната власт. – А, јас ќе направам сè за тоа да стане реалност. Гевгелија чиста и град пример не само за Македонија туку и за регионот!